Ich han mich däzue entschiede mini Massage dä Öffentlichkeit aazbüte will mir duur d Rückmeldige woni becho han immer klarer worde isch, wie wärtvoll mini Berüehrige für anderi Mänsche sind.

Glichzietig liit ii dem Schritt zur Selbständigkeit zur Ziet mis gröschte Wachstumspotenzial.

Mini persönliche Wärtvorstellige, mini Läbesfreud und mini Neugier händ mich vor sächs Jahr uf min tantrische Weg gleited. Ide Sinnlichkeit und de Läbesphilosophie vom Tantra hani s Vokabular für mini Wahrnähmig vode Welt känneglernt und han mich so Schritt für Schritt uf min ganz persönliche Läbesweg beghä:
Wäg vo gsellschaftliche und familiäre Konditionierige, nöcher zu minre Authentizität.

Zum mim meischt authentische Weg treu bliebe, han ich 2019 min Bruef als Kommunikationsspezialistin (HWZ, BSc) ide Zürcher und internationale Wirtschaftswelt uufghe. Miis Härz brännt defür, Mänsche uf ihrem Weg zu Ihrere Selbschtermächtigung z understütze und somit min Biitrag dezue z leischte, dass sich eusi Gsellschaft zu einere entwickle chan, ii wellere mir einzeln duur d Verbindig mit eus selber au meh id Verbindig zunenand findet.

Duur die Entwicklig han ich natürli au zersch selber müesse gaa: Trotz grosser Angscht und vielne Unsicherheite immer wieder z erfahre, wieviel besser s Läbe wird, wenni d Kontrolle uufgibe und mir selber vertraue, hät dezue gfüehrt, dass d Ungwüssheit hüt eini vo mine beschte Fründinne isch. Die Beziehig wird gstützt und gleited vo minre bedingigslose Präsenz, Achtsamkeit, und Akzeptanz. Uf däne drü Wärt basiered au mini Massage.

Nach däne sächs intensive Jahr Erfahrige sammle, Fähigkeite verfiinere und nachhaltigi Kompetänze entwickle, möcht ich die wärtvolle Schätz wo sich dadruus gformt hend, mit dir teile. Dadezue isch es vo Vorteil, dass du folgendes über mich weisch:

• Mini Fiinfühligkeit hilft mir debii, iifühlsam uf dich iizgaa und somit nöd nur din physische sondern au din energetische, emotionale und seelische Körper z berüehre, sofern das gwünscht isch

• Ich red nöd gern um de heiss Brei ume. Mit dinre Bereitschaft und Offeheit defür sprich ich die für dich meischt relevanti Essenz aa wo dich nöcher zu dir selber bringt. Uf ä direkti, liebevolli Art.

(Wow! Du hesch bis da anne alles gläse?! Danke :D)

• Es isch sehr eifach für mich, Verbindig spürbar wärde z laa

• Mini Händ sind in direkter Verbindig zu mim Härze und uus däre Intention berüehr ich dich au

• Min Körper kreiiert ganz natürlich en Uusglich: Wo's dunkel isch, bring ich s Liecht, wo’s unruhig isch bring ich dä Friede, undsowieter

Ii dä Wält vom fühle und flüsse, vom stetige in Bewegig sii und im richtige Moment chönne innehalte zum d Lääri und Stilli ihri Weisheit mitteile z laa, da bin ich dihei.

Wänn das Qualitäte sind wo dich aaspräched, dänn freu ich mich vo dir z läse :)